Azərbaycanda virus hepatitləri, xüsusilə Hepatit B və Hepatit C infeksiyaları ciddi ictimai sağlamlıq problemlərindən biri hesab olunur. Bu xəstəliklərin vaxtında aşkarlanması və düzgün müalicəsi qaraciyər sirrozu, qaraciyər çatışmazlığı və qaraciyər xərçəngi kimi ağır fəsadların qarşısını almaqda mühüm rol oynayır. Məhz bu məqsədlə TƏBİB tərəfindən xüsusi hepatit komissiyaları fəaliyyət göstərir.
TƏBİB-in tabeliyində olan tibb müəssisələrində hepatit xəstələrinin diaqnostikası, ambulator və stasionar müalicəsi həyata keçirilir. İcbari tibbi sığortanın Xidmətlər Zərfi çərçivəsində hepatit xəstələri bir sıra tibbi xidmətlərdən ödənişsiz yararlana bilirlər. Bunlara laborator analizlər, biokimyəvi və immunoloji testlər, ultrasəs müayinələri, elastometriya, MRT və digər instrumental müayinələr daxildir.
TƏBİB-in Hepatit Komissiyası əsasən Hepatit B və Hepatit C virusuna yoluxmuş şəxslərin virusəleyhinə dərman preparatları ilə təmin olunmasını təşkil edir. Vətəndaş ilkin olaraq yaşadığı ərazi üzrə tibb müəssisəsinə müraciət edir, lazımi müayinələrdən keçir və nəticələr əsasında sənədləri elektron formada Komissiyaya təqdim olunur. Müalicəyə göstəriş olan xəstələr xüsusi qeydiyyata alınaraq mərhələli şəkildə dərman təminatına cəlb edilirlər.
Son illərdə hepatit xəstələrinin xidmətlərə əlçatanlığını artırmaq məqsədilə regionlarda da komissiyalar yaradılır. Gəncə Regional Komissiyası artıq fəaliyyət göstərir, Lənkəran Regional Komissiyasının isə fəaliyyətə başlaması planlaşdırılıb. Bu addım bölgələrdə yaşayan vətəndaşların Bakıya gəlmədən müalicə prosesinə qoşulmasına imkan yaradır.
Hepatitdən şübhələnən şəxslər aşağıdakı hallarda mütləq həkimə müraciət etməlidirlər:
- Uzunmüddətli halsızlıq və yorğunluq;
- Dərinin və gözlərin saralması;
- Qarın nahiyəsində ağrı və ağırlıq hissi;
- İştahsızlıq və ürəkbulanma;
- Qaraciyər göstəricilərində dəyişikliklər.
Erkən diaqnoz həm müalicənin effektivliyini artırır, həm də xəstəliyin digər insanlara ötürülməsinin qarşısını alır.
Mütəxəssislər bildirirlər ki, hepatitlərin qarşısının alınmasında peyvəndləmə, steril tibbi alətlərdən istifadə, təhlükəsiz qan köçürülməsi və şəxsi gigiyena qaydalarına riayət xüsusi əhəmiyyət daşıyır. Hepatit B-yə qarşı peyvənd ən effektiv qoruyucu vasitələrdən biri hesab olunur.
TƏBİB-in Hepatit Komissiyasının fəaliyyəti ölkədə hepatitlə mübarizənin gücləndirilməsi, xəstələrin müalicəyə çıxışının artırılması və ağırlaşmaların azaldılması baxımından mühüm əhəmiyyət daşıyır.
